Nafarroako sokatira txapelketaren ondotik, atsedenerako astirik gabe, Euskal Herriko launakako sokatira txapelketa hasi da asteburu honetan. Igande goizean, emakumeen txapelketa jokatu zuten Antsoainen, 250 kiloko kategorian eta Nafarroako txapelketaren bidetik, hemen ere Beti Gazteko emakumeak nagusitu ziren.
Antsoainen tiraldi guztiak irabazita Euskal Herriko txapeldun suertatu zen Beti Gazteko laukotea. Irantzu Goienetxe, Ainhoa Etxegarai, Ainhoa Ubiria eta Maria Iantzi aritu ziren tiran, Joxe Angel Mitxelena entrenatzaile eta Udane Arbelaitz laguntzaile.
Lesakarrek Ibarra A taldeari irabazi zioten finalean eta Ibarra Bk osatu zuen podiuma. Txantrea izan zen laugarren, Berriozar bosgarren, Antsoain seigarren, Amaiur zazpigarren, Badaiotz zortzigarren eta Araxes bederatzigarren.
Gizonezkoena eta mistoa
Gizonezkoen txapelketa abenduaren 4an jokatuko dute, 310 kiloko kategorian (laukote bana aurkeztuko dute Amaiurrek eta Beti Gaztek), Itxasun; eta abenduaren 10ean, txapelketa mistoa jokatuko dute 280 kiloko kategorian, Berriozarren (bi talde Amaiurrek eta bakarra Beti Gaztek).