Cederna Garalur elkarteak, Nafarroako Mendialdeko Tokiko Ekintza Talde gisa, parte hartzeko prozesu bat bultzatu du irailean eta urrian, 2023-2027 urteetako Partaidetzazko Toki Garapeneko Estrategia definitzeko helburuarekin. Dinamika horren bidez, Elkarteak Estrategia berriaren lan-ildoak adostu nahi ditu Nafarroako Mendiko eragileekin. Estrategia horrek 7,3 milioi euro baino gehiago izanen ditu, eta Nafarroako Gobernuak eta Europar Batasunak finantzatuko dituzte, Landa Garapenerako Planaren bidez.
Prozesu horretan, ia 130 pertsonek hartu dute parte. Zehazki, 66 gizonek eta 63 emakumek, lau lurralde-mahairen, sei sektore-mahairen eta kanal digital irekien bidez, diagnostiko komun bat eta lurraldearen erronkei erantzunen dieten proiektuak eta ekintzak definitu dituzte.
Zehazki, Donezteben, Irunberrin, Ariben eta Irurtzunen egindako lau Lurralde Mahaietan 82 pertsonek parte hartu dute, lurraldearen eskualde-berezitasunak definitzea eta eskualde-ikuspegien aniztasuna ematea helburu zutenak. Mahai horietatik 158 ekarpen egin dira diagnostikora eta 126 ekintza-proposamen sortu dira datozen urteetarako.
Bertzalde, sei sektore-mahai egin dira, honako arlo hauetan banatuta: nekazaritzako elikagaien sektorea, turismoa, merkataritza eta zerbitzuak, natura-ondarea eta natura-guneen kudeaketa, basogintza eta energia, enplegua, ekintzailetza, enpresen sendotzea, artisautza eta industria, ondarea, kultura eta euskara eta bizi-kalitatea (azpiegiturak, berdintasuna, oinarrizko zerbitzuak.).
Bere helburua lurralde osorako diagnostikoa bateratzea izan da, eta izaera sektoriala duenez, jorratutako gai bakoitzean sakontzea eta proposamenei ikuspegi zehatzagoa eta espezifikoagoa ematea. Mahai horietan 47 pertsonak hartu dute parte, eta 125 ekarpen egin zaizkio diagnostikoari eta 204 ekintza-proposamen zehatz.
Prozesu osoarekin batera, Elkarteak iradokizun-postontzi bat ireki du bere webgunean, bere proposamenak bidali nahi dituenarentzat. Mezu hori azaroaren 11 arte egongo da eskuragarri.
Ibon Mimentza Cederna Garalurreko zuzendari-gerenteak nabarmendu du «pozgarria» izan dela «lurralde osoko pertsonak eta erakundeak elkarrekin lanean ikustea, ditugun erronkei aurre egiteko. Gure ustez, prozesu honen emaitzak balio izango du hemen bizi diren pertsonen benetako beharretara egokitutako estrategia bat egiteko, eta lurraldearentzat garrantzitsuak diren proiektu publiko zein pribatu asko martxan jartzen lagunduko du».
Partaidetza-prozesuaren ondotik, estrategia teknikoki definitzea geratzen da, aurkeztu ahal izateko eta Lurraldearen egoera hobetzeko pentsatutako proiektuak eta ekintzak bultzatuko dituzten finantzaketa-palankak abian jartzeko.