Genero indarkeria jasan duten edo jasaten duten emakumeentzat musikoterapia tailerra antolatu dute Baztan-Bidasoaldean

Urtero bezala, genero indarkeria jasan duten edo jasaten duten Bortzirietako, Malerrekako, Bertizaranako, Baztango eta Xaretako emakumeentzako musikoterapia tailerra antolatu dute Baztango Udalak, Malerrekako Mankomunitateak eta Bortzirietako udalek. Tailerra dohainik da eta argitu dutenez, anonimoa da: «tailerrean parte hartzen duten emakumeek eta musikoterapeutak bakarrik ezagutuko dute elkar».

Bortzirietako berdintasun teknikariak ohar bidez adierazi duenez, hainbat helbururekin antolatu dute tailerra: «emakumeentzat sostenguzko espazio ziur eta sortzailea sortzeko, parte hartzaileek emozioak modu eraginkorragoan kudeatzeko, isolamendu sozial eta emozionala guttitzeko eta autoezagutza sustatzeko». Gaineratu duenez, «orain arte parte hartu duten emakumeen balorazioak hagitz positiboak izan dira. Esperientzia aunitzek erakutsi dute musikoterapiak genero indarkeria jasan duten emakumeengan onura positiboak izan ditzakeela hainbat esparrutan: antsietatean, estresean, norberaren ahalduntzean, autoestimuan eta depresioaren murriztean, bertze hainbaten artean».

Izen ematea

Guztira 12 saioko tailerra izanen da. Azarotik otsailera aste bakoitzean bi orduko saio bat eginen dute. Tailerrean parte hartzeko Haizea Loira musikoterapeutarekin harremanetan jarri behar da, urriaren 26a baino lehen, 655 74 76 95 telefonoaren bitartez.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun