Parafarmaziako produktu bat % 40 garestiagoa izan daiteke erosten den farmaziaren arabera Irache kontsumitzaileen elkarteak dioenez

Ttipi-Ttapa 2022ko urr. 2a, 11:00
Farmazietan saltzen diren omeopatiako zenbait produkturen irudia

Irache Nafarroako kontsumitzaileen elkarteak egin duen azterlan baten arabera, parafarmaziako produktu beraren prezioa % 40 ere alda daiteke erosketa egiteko aukeratutako establezimenduaren arabera.  Irachek dioenez, kontsumitzaileak ia hamar euro aurrez ditzake 43 euroko erosketa batean bateko eta bertzeko prezioak begiratuz gero. Dietoterapiako produktuak, kosmetikoak, elikagaiak eta osagarriak, intsektuen uxagarriak, haurtzaintzako produktuak eta bertze batzuk sartzen dira parafarmaziako produktu horiek artean.

Bainurako gela, 13 eurotik 19ra
Irachek bere azterlanean hogeita hamar farmazia bisitatu ditu, eta hiru produkturen prezioari buruz galdetu du, aurreko urteetan egindako analisietan konparatutako produktu berberei buruz. Azterlan honen emaitzek agerian uzten dute produktu bera % 40 garestiagoa izan daitekeela aukeratutako establezimenduaren arabera. Hori da litro bateko Eucerin bainurako gelaren preziorik merkeenaren eta garestienaren arteko aldea: merkeenak 13,5 euro balio zuen, eta garestienak, 19 euro.
 
Lacer markako 125 mililitroko hortzetako pastan, garestienaren eta merkeenaren arteko prezio-aldea % 39 da, 4,95 eurotik 6,9 eurora.
 
Bularreko haurrentzako esnea, ia sei euroko aldea
Bertzalde, Nutriben 1 bularreko haurrentzako 800 gramoko esne hauts ontziari dagokionez, eskaintzarik merkeena 17,95 eurokoa zen eta garestiena 23,90 eurokoa, %33ko gehienezko aldea.
 
Ia hamar euroko aldea 43 euroko erosketa batean
Aipatutako hiru produktu horiek erostean eta aukeratutako farmaziaren arabera, kontsumitzaileak 9,35 euro aurrez ditzake; hau da, 39,4 euro ordaindu beharrean 48,8 euro ordainduko ditu erosleak.
 
% 30eko aldea krema hidratatzaile batean

Hiru produktu horiez gain, bertze laginketa bat ere egin du Irachek, parafarmaziako produktu espezifikoago batekin, Avene krema hidratatzailearekin. 5,5 eurorainoko prezio aldeak aurkitu ditu, hau da, prezio merkeenaren eta garestienaren arteko %30eko aldea.

Produktu batzuk, sustapenekin eskainiak

Produktu batzuk sustapen edo promozioren batean sartuta daude, eta kontsumitzaileak ez du beti eskaintza komertzial horretatik kanpo erosteko aukerarik. Konparaziora, maiz bainurako gelak produktuaren 400 mililitro gehiago eskaintzen ditu doan kargatzeko. Hortzetako pasta, gehienetan, formatu bikoitzean eskaintzen da, eta krema hidratatzailea erostean, zenbait farmaziak produktu kosmetiko erantsiren bat eskaintzen dute, makillajea kentzeko produktu gisa.

Bezeroarekin tratu ona

Irachek dioenez, tratua arras zuzena izan zen bulego guztietan. Horietako batzuetan prezioak erakusleihoetan jartzen ziren erakusgai, edo barra-kode irakurle bat zegoen kodea pasatu eta prezioa ezagutzeko. Arras praktika onak dira, informazioa errazten baitiote kontsumitzaileari. Izan ere, badira web orria duten farmaziak, eta horietako batzuek produktuen prezioaren berri ematen dute.

Kasu batzuetan, produktu bakoitzaren prezioari buruz telefonoz galdetu zen, eta denetan kontsumitzaileari informazioa eskaini zitzaion eta, produktua ez zutenean, momentu hartan enkargatzeko aukera eskaini zitzaion telefonoaren bertze aldean zegoenari.

Sektoreko lehia edo konpetentzia

Iracheren iritziz, azterketak sektoreko lehia edo konpetentzia erakusten du, eta, horri esker, eskaintza eta deskontu gehiago garatu dira, herritarrak etekina atera ahal izateko.

Horrela, kontsumitzaileak, prezioak eta establezimenduak alderatzeko denbora hartzen badu, farmazietan saltzen diren produktu batzuen kostua nabarmen merkatzea lor dezake, bereziki parafarmaziako produktuena.

Ekonomia

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun