Antonio Alustiza aresoarrak bere 20. txapela jantzi du Uharte Arakilen

Ttipi-Ttapa 2022ko abu. 31a, 18:00

Lekarozko Kortariko gaztak irabazi du XLI. gazta lehiaketa

Nafarroako Artzain Zakurren Txapelketa eta Nafarroako ardi latxen esne gordinarekin egindako gazta lehiaketa jokatu zituzten joan den asteburuan Uharte Arakilgo Artzain Egunean. Artzain Zakur Txapelketan, aresoarra nagusitu zen, Ttiki zakurrarekin, eta bigarren postuan Oronozko Jorge Oteiza gelditu zen, Lagun zakurrarekin. Argazkiak: Uharte Arakilgo Artzain Eguna.

Bikain moldatu ziren Antonio Alustiza eta Ttiki zakurra, eta erraz lortu zuten garaipena, 308 punturekin. Gisa honetara, Nafarroako 20. txapela etxeratu zuen aresoarrak. Ez hori bakarrik. Ttikik lortu zuen arraza bikaineko zakurraren saria ere. Aske zakurrarekin ere parte hartu zuen Alustizak, eta seigarren postuan sailkatu zen.

Oronozko Jorge Oteizak Lagun zakurra izan zuen ondoan, eta bigarren gelditu ziren, 271 puntu eskuratuta. Aritz Ganboa eta Txistu bere zakurrak osatu zuten podioa, 234 puntu eskuratuta.

Uharteko Artzain Egunaren barrenean, gazta lehiaketa ere egin zuten. 2018an eta 2019an bezala, Lekarozko Kortariko gaztarentzat izan zen sari nagusia, eta Julen Arburuak eta Irati Usandizagak hartu zuten saria. Gazta irabazlea enkantera atera zuten eta 4.700 eurotan La Cuchara jatetxeak erosi zuen.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun