Leitzan eta Areson jokatu ondotik abuztuaren 18an Zubietara ailegatuko da Plazaz Plaza txapelketa

Ttipi-Ttapa 2022ko abu. 17a, 09:00
Aresoko plazan jendetza bildu zen amabirjin egunean eta partida borrokatua ikusi zuten.

Asteburu luze honetan, Plazaz Plaza txapelketako hainbat partida jokatu dituzte Ados pilota elkarteko pilotariek, tartean Leitzan eta Areson. Abuztuaren 18an, ostegun eguerdian, berriz, Zubietan jokatuko dute. Txapelketaz kanpo, pilota jaialdia izan dute Arantzan ere.

Asteburu luzearen errepasoa eginez, ostiralean Leitzan jokatutako partidan etxeko pilotariak nagusitu ziren: Goiuri Zabaleta eta Iera Agirre Iturriagak 22-14 irabazi zieten Etxegarai eta Orbegozori. Aurretik, pilota eskolako txikiak aritu ziren.

Leitzako plazan herriko alabak nagusitu ziren, Iturriaga eta Zabaleta (gorriz).

Igandean Azagran, Irantzu Etxebeste Iantzi beratarrak eta Orbegozok 22-14 irabazi zieten Etxegarai eta Zabalari.

Irantzu Etxebeste Iantzi beratarra jokaldia egiten igandean Azagran. Garaile suertatu zen.

Astelehenean Aresoko plaza ederrean jokatutako partida lehiatua eta emozio handikoa izan zen. Azkenean, Arrietak eta Mujikak 22-21 irabazi zieten Barrocal eta Mendibururi.

Lehia estua eskaini zuten lau pilotariak Areson. Tanto bakarragatik urdinak gailendu ziren.

Asteartean, azkenik, Plazaz Plaza txapelketaren barrenean, Eltziegon aritu ziren eskualdeko hiru pilotari. Irantzu Etxebeste Iantzi beratarrak eta Iera Agirre Iturriaga leitzarrak 22-13 irabazi zieten Goiuri Zabaleta leitzarrari eta Ruiz de Larramendiri.

Eltziegon Iturriaga eta Iantzi nagusitu zitzaizkien Zabaleta eta Ruiz de Larramendiri.

Txapelketaz kanpoko jaialdiak ere eskaini ditu Ados pilota elkarteak, tartean Arantzan astelehenean. Iera Agirre Iturriagak eta Naroa Agirrek 22-17 irabazi zieten Irantzu Etxebeste Iantzi eta Mujikari.

Txapelketakoa ez bazen ere, partida ederra eskaini zuten amabirjin egunean Arantzan.

Abuztuaren 18an Zubietan

Lehen fase honetan eskualdean jokatuko duten Plazaz Plaza txapelketako azken partida abuztuaren 18an, ostegun eguerdian jokatuko dute Zubietako plazan. Herriko Naroa Elizalde Etxekolonea eta aita zubietara duen Ane Mendiburu ariko dira Arrieta eta Naroa Agirreren kontra.

Naroa Elizalde Etxekolonea zubietarrak sorterrian txapelketako partida jokatzeko aukera izanen du ostegun eguerdian.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun