Nafarroako gizonezkoen lokotx biltze txapelketa eta hirugarren mailako aizkora txapelketaren finala jokatu zituzten igande eguerdian Donamariako plazan. Lokotx-biltzen Anizko Unai Iantzi suertatu zen txapeldun eta aizkoran Baionako Ibai Telletxea.
Nafarroako gizonezkoen lokotx biltze txapelketan Unai Iantzi aniztarra izan zen nabarmen onena eta 6 minutu eta 13 segundo aski izan zituen 50 lokotxak biltzeko. Bertze lau lehiakideek zazpi minutu baino gehiago behar izan zituzten. Berroetako Asier Gamio izan zen bigarren (7.05) eta Sunbillako Eneko Herrerak osatu zuen podiuma (7.24). Podiumetik sei segundora, laugarren izan zen Elizondoko Iñaki Telletxea (7.30) eta bosgarren Josu Elizalde (7.53).
Nafarroako hirugarren mailako aizkolari txapelketaren finalari dagokionez, bi 45 ontzako eta bi kanaerdiko moztu behar izan zituzten Donamarian. Baionako Ibai Telletxea izan zen bizkorrena (12.01), Etxarri Aranatzeko Aritz Oiarbide bigarren (12.28), Itsasuko Patxi Igoa hirugarren (12.33), Berako Endika Goia laugarren (12.48) eta Urdiaingo Amets Aristizabal bosgarren (14.01).