Nafarroako 20.000 biztanletik beherako 41 udalerrik eta kontzejuk 3,1 milioi euroko laguntzak jasoko dituzte, ur-hartuneak, banaketa-sareak, ur-biltegiak eta ura edangarri bihurtzeko instalazioak hobetzeko eta berritzeko, hornidura-sistemetan ur-galerak murrizteko, kontsumoa aurrezteko eta hornidura-bermea handitzeko. Denera hogei proiektu diruz lagunduko dituzte 2022 eta 2025 urteen artean, eta gehienez ere inbertsioaren % 80 lagunduko dute.
Eskualdeari dagokionez, Berako udalak 340.000 euroko inbertsioa jasoko du Zalaingo ur-depositutik Foru Plazara bitarteko ur-hornidura sarea berritzeko. Goizuetako udalak 22.500 euroko laguntza hartuko du Kale Nagusiko 63 eta 65 zenbakietako ur-hornidura sareko ur-galerak murrizteko eta kontsumo-emaria kontrolatzeko. Malerrekako Mankomunitateak sustatutako Mendaur Ur Edangarriko Tratamendu Estazioa hobetzeko proiekturako 10.800 euroko dirulaguntza jasoko du. Sunbilla, Doneztebe, Elgorriaga, Ituren, Aurtitz, Latsaga eta Zubietari ematen dio zerbitzua estazio honek.