Maila nagusian lau jardunaldi eta finala jokatuko dituzte, eta talde bakoitzak bi jardunalditan hartuko du parte. Denbora guztiak gehitutakoan denbora onena lortzen duten lau taldeak Añorben abuztuaren 27an jokatuko den finalera sailkatuko dira. Gazteen mailan, hiru jardunaldi jokatuko dituzte liga sistema bidez.
Astelehen honetan Elizondon, maila nagusian Arantza, Arraioz, Berriozar, Goizueta aritu ziren nor baino nor gehiago, bi proba konbinatutan. Lehenbizikoan, lokotx biltzen, zaku lasterketan, aizkoran, korrika eta arpanarekin, bigarrenean, txinga-eramaten eta ingude altxatzen.
Gazteen mailan, berriz, Lokotx biltzen, zaku lasterketan, txinga eramaten, korrika eta arpanan.
Ikusmin handia piztu zuen Herriz Herriko txapelketaren lehenbiziko jardunaldiak, eta lehia eta emozio ederraz gozatzeko aukera izan zen. Azkenean, maila nagusian bi proba konbinatuak kontuan hartuta, Arantza izan zen azkarrena, bigarrena Arraioz, hirugarrena Goizueta, eta laugarrena Berriozar. Gazteen mailan, berriz, Araxes nagusitu zen, eta Berriozar, Igantzi eta Antsoain sailkatu ziren ondotik.