Bi partidak larunbatean 10:30ean jokatuko dituzte. Oizen, etxeko taldea plazaren ezaugarri bereziak aprobetxatu nahiko ditu gaur egungo txapelduna, Irurita Migelene, menpean hartzeko. Arraiozen, berriz, iaz txapeldunorde izan zen Arraioz Sagardiak txapelketako partida guztiak irabazi dituen Doneztebe The Moment hartuko du.
Zuzen bidean, hurrengo asteburuan jokatuko dituzte finalerdietako itzulerako partidak eta orduan jakinen da abuztuaren 6an Doneztebeko Bear-Zana pilota plazan jokatuko den finalean zein talde izanen diren, baita hirugarren posturako lehiarako zein geldituko diren.