Buruz buruko Kutxabank erremonte txapelketan parte hartu ahal izateko lehen bi aurrekanporaketak jokatu zituzten astearte arratsaldean Galarretan. Oier Apezetxea goizuetarrak 30-24 irabazi zion Oskar Urrutia II.a saldiastarrari eta jaialdiko lehen partidan, Martirena uitziarrak 30-17 irabazi zion Odeiri.
Goizuetarraren eta saldiastarraren arteko partida berdindua izan zen, indarrak parez pare, baina Apezetxeak hobeki asmatu zuen sakearekin une erabakigarrietan. Hainbat berdinketen ondotik, hogeita launakoa izan zen azkena eta hondarreko sei tantoak segidan egin zituen goizuetarrak.