Euskal Herriko II. disc golf txapelketan parte hartu dute Baxi Basajauna taldeko hiru kirolarik larunbatean Bizkaian, Sestao-Portugaleteko Ondejedas-Rivas zelai berrian (bitxikeri moduan, hamar saski Sestaon eta zortzi saski Portugaleten ditu) eta emaitza bikainekin bueltatu dira. Eskarmentu gehien dutenak Iñaki Gonzalez Olaizola eta Doneztebeko Mikel Ibarrola dira eta biek podiumera igo ziren, 50 urtez goitikoen kategorian (MP+50): Gonzalez bigarren izan zen eta Ibarrola hirugarren, Sean Young bilbotarraren gibeletik. Halere, ustekaberik handiena Doneztebeko Oier Erkizia Amorosek eman zuen. Lehen parte-hartzea zuen konpetizioan hemezortzi saskiko zelai batean eta bikain ibili zen. Horren erakusgarri, bera da Euskal Herriko txapeldun berria 18 urtez beheitiko kategorian.
Beñat Lopez bilbotarra gibelean utzi zuen MJ18 kategorian. Aipatzekoa da Euskal Herriko txapeldun guztiak, Oier Erkizia izan ezik, Bilbao DG Clubekoak zirela. Emakumeen FPO mailan Vilja Hulden, aitzineratuek MA1 kategorian Aidan Young, MP+40 beteranoetan Hal Matter eta MP+50 kategorian Sean Young.
Mendaur eta Toki-Onako ikasleekin topaketa igandean Irrisarrin
Disc golf kirola ezagutzera emateko helburuarekin, Doneztebeko Mendaur eta Berako Toki-Ona institutuetan kirol hau landu dute azken hilabeteetan. Ikasgelan landutakoa Igantziko Irrisarri Landeko zelaian plazaratzeko aukera izan zuten igandean, bertan bildu baitziren Iñaki Gonzalez eta Josu Erkizia irakasleekin. Zelai handi batean disc golfean aritzea zer den dastatu ahal izan zuten eta bertze egun batean kirola ezagutzen segitzeko gelditu ziren.
Aipatzekoa da Doneztebeko besten barrenean ere DiscGolf txapelketa antolatu dutela uztailaren 2an, uztaileko lehen larunbat goizean Intzakardiko parkean.