Nafarroako 4x4 sokatira txapelketako pisu arinetako lehia hasiko da larunbatean Betelun

Amaiurrek hiru talde aterako ditu pisu arinean, emakumezkoen bat eta gizasemeen bi.

Emakumezkoen 235 kiloko eta gizasemeen 300 kiloko lehen jardunaldiaz gain, 20 urtez beheitikoek eta kadeteek bigarrena jokatuko dute

Nafarroako launakako sokatira txapelketako maila nagusietan jokoan paratutako bortz txapelketatik hiru eman dira dagoeneko eta hiruak (txapelketa mistoa, emakumeen 255 kilokoa eta gizonezkoen 320 kilokoa) Beti Gaztek jantzi ditu. Azken bi jardunaldietan pisu arinetan lehiatuko dira emakumeak eta gizasemeak, 235 eta 300 kilotan. Lehen saioa Betelun izanen dute maiatzaren 14an, larunbat arratsaldean.

Emakumezkoen pisu arinean, Amaiur eta Beti Gazterekin batera, Araxes A, Araxes B, Berriozar eta Txantrea ariko dira. Gizonezkoen pisu arinean, berriz, Amaiur, Berriozar eta Txantreak bina talde aterako dituzte eta Beti Gaztek eta Antsoainek bana.

Maiatzaren 21ean jokatuko dute hondarreko jardunaldia Berriozarren. Emakumezkoen 235 kiloko eta gizonezkoen 300 kiloko txapela bertan erabakiko da eta 20 urtez beheitikoek eta kadeteek hirugarren jardunaldia, eta ondotik, lehen bi sailkatuen arteko finalak izanen dituzte.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun