Larunbatean manifestazioa egin zuten Iruñean haur eskolen duintasunaren alde lelopean, eta manifestazio ondoren irakurritako mezuan gobernuak «gutxietsi» egin dituela, eta «negoziatzeko ahalegin guztiak eten» dituztela salatu zuten. Tokiko udalei gobernua «presionatzeko» eskatu zioten, eta nabarmendu zuten «urgentea» dela negoziaketa mahaia eratzea: «Nafarroako gobernuak ezin du beste aldera batera begira jarraitu».
Larunbatean bete ziren sei egun hezitzaileak greban zirela, eta ordura arteko balantze positiboa egin zuen Eider Garde Nafarroako 0-3 plataformako bozeramaileak. «Harrituta gaude orain arte jasotako erantzunarekin. Hala ere gure sentsazioa gazi-gozoa da guk ez dugulako greba mugagabea egin nahi. Greba oso gogorra izaten ari da guretzat erabateko prekarietatean gaudelako».
Hainbat herritar eta eragileren babesa
Hainbat dira azken egunetan eskualdean haur eskolen alde egindako ekintza eta protestak. Oraindik ere, eskualdeko herritarren babesa jasotzen jarraitzen dute. Narbarteko Arotzenea eskolak bere babesa adierazi zien greban zeuden langileei.
Horrekin batera, Berako Udaleko ordezkariak Berako Mukixu haur eskolako langileekin bildu ziren, eta beren babesa adierazi zieten.
