Nafarroako 4x4 sokatira txapelketako pisu astunetako txapelak ere Beti Gaztek jantzi ditu

Ttipi-Ttapa 2022ko mai. 9a, 11:00
Beti Gazteko gizonezkoak eta emakumezkoak, pisu astunetan lortutako txapelekin.

Nafarroako launakako sokatira txapelketako emakumezkoen eta gizonezkoen pisu astunetako txapelak (255 eta 320 kilo, hurrenez hurren) Lesakako Beti Gaztek jantzi ditu maiatzaren 7an Antsoainen. Gizasemeetan Amaiur bigarren izan zen.

Emakumezkoen pisu astunean, 255 kilokoan, Beti Gazterekin batera, Amaiur A eta B, Antsoain, Txantrea eta Araxes A lehiatu ziren. Beti Gaztek tiraldi guztiak irabazi zituen. Laukote txapeldunean, Ane Gurrutxaga, Maialen Lopez, Ainhoa Ubiria eta Maria Iantzi aritu ziren, Karmele Pikabea entrenatzaile zutela. Beti Gazteren ondotik, Antsoain eta Txantrea igo ziren podiumera. Amaiur A laugarren izan zen, Amaiur B bosgarren, Araxes A seigarren eta Araxes B zazpigarren.

Emakumezkoen podiumean, Beti Gazte txapeldun, ntsoain eta Txantrearekin batera.

Gizasemeetan, lesakarrekin batera, Amaiur, Txantrea, Berriozar eta Antsoain aritu ziren. Hemen ere Beti Gazteko laukoteak tiraldi guztiak irabazi zituen txapela janzteko. Karmelo Mitxelena, Beñardo Iantzi, Iñigo Altzugarai eta Julen Palenzuela aritu ziren tiran, Eneko Saldias entrenatzaile zutela. Amaiur bigarren izan zen eta Berriozar hirugarren. Txantrea laugarren izan zen eta Antsoain bosgarren.

Gizonezkoen podiumean, Beti Gazte txapeldun, Amaiur bigarren eta Berriozar hirugarren.

Tiralari helduekin batera, 20 urtez beheitikoek eta kadete mailakoek ere lehen jardunaldia jokatu zuten. 20 urtez beheitikoetan ez zen eskualdeko ordezkaririk (Berriozar nagusitu zen), baina kadete mailan Amaiur lehiatu zen eta bigarren izan zen, Antsoain A taldearen gibeletik.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun