Urrezko banakako aizkolari txapelketako jardunaldiak jokatuko dituzte larunbatean Arribe-Atallon eta igandean Getarian

Ttipi-Ttapa 2022ko mai. 5a, 20:00
Julen Olano leitzarra Arribe-Atallun ariko da larunbat arratsaldean eta Zigako Joxean Etxeberria igande eguerdian Getarian.

Larunbateko jaialdia bukatzeko Josetxo Urrutia leitzarrak erakustaldia eginen du 142 kiloko ingude zaharrarekin

Urrezko banakako aizkolari txapelketako jardunaldi bikoitza izanen da asteburu honetan: larunbat arratsaldean Arribe-Atallun ariko dira eta igande eguerdian Getarian (Gipuzkoa), Antxua Egunaren barrenean.

Larunbat arratsaldean Arribe-Atallun

Arribe-Atalluko jardunaldia maiatzaren 7an, larunbatean 19:00etan hasiko da. Bederatzi aizkolari lehiatuko dira final-laurdenetarako hiru txartelen bila: Julen Olano leitzarra izanen da eskualdeko aizkolari bakarra eta berekin batera, Borja Fernandez (Valsain), Daniel España (Valsain), Jon Rodriguez (El Espinar), Julen Gabirondo (Urnieta), Xuban Kañamares V.a (Arostegi), Eneko Saralegi (Errazkin) eta Arribe bertako Txomin Amundarain eta Ibai Soroa lehiatuko dira.

Gizonezko aizkolariez gain, emakumezkoen harri-jasotze txapelketaren barrenean, Marina Blanco palentziarra 63na kiloko harri kubikoarekin eta borobilarekin ariko da. Jaialdia bukatzeko, Josetxo Urrutia leitzarrak erakustaldia eginen du 142 kiloko ingude zaharrarekin.

Getariako Antxua Egunean igande eguerdian

Urrezko banakako aizkolari txapelketak segida izanen du igandean 12:30ean Getarian (Gipuzkoa), Antxua Egunaren barrenean eta ETBk zuzenean emanen duen jaialdiarekin. Hemen sei aizkolari lehiatuko dira final laurdenetako hiru txartelen bila: Zigako Joxean Etxeberria izanen da eskualdeko aizkolari bakarra eta berekin batera, Ioritz Gisasola Zelai IV.a (Mallabia), Oier Kañamares V.a, (Arostegi), Ugaitz Mugertza II.a (Mutriku), Suharri Rodriguez Paolla (Hernani) eta Iker Vicente (Otsagi).

Gizonezkoez gain, emakumeak ere ariko dira aizkoran Getarian, emakumezkoen banakako aizkolari txapelketaren barrenean: Uxue Ansorregi (Mendaro), Beatriz Tanco (Murillo el Fruto) eta Karmele Gisasola Zelai III.a (Mallabia) izanen dira hiru lehiakideak.

Emakumezkoen harri-jasotze txapelketan, berriz, Usurbilgo Lur Errekondo ariko da, 63na kiloko harri kubikoarekin eta borobilarekin.

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun