Dantxarinea eta Ibardingo Merkatarien Elkarteek laguntza humanitarioa duen kamioi bat bidaliko dute Ukrainara

Ttipi-Ttapa 2022ko api. 1a, 11:00
Chernobilen Lagunak elkartearen bidez eramanen da laguntza Ukrainara.

Apirilaren 2-3ko eta 9-10eko asteburuetan eginen dute elikagai, osasun material, higiene produktu eta bertzelako materialen bilketa

Ibardingo eta Dantxarineko merkatarien elkarteetako postuek Ukrainara laguntza humanitarioa duen kamioi bat eramatearen kostua ordainduko dute. Laguntza 25 urte baino gehiagoz Ivankiv-eko zonaldetik umeak ekartzen dituen Chernobilen Lagunak elkartearen bidez eramanen da.

Nahi duten pertsona guztiek apirilaren 2-3ko eta 9-10eko asteburuetan eman ditzakete ukrainarrei helarazi nahi dizkieten produktuak.

Gehien eskatzen diren produktuak hauek dira:

  • Elikagaiak: Barratxo energetikoak, txokolate beltza, kontserbak (haragia, arraina, lekaleak eta frutak), gailetak, pasata, arroza, irina, olioa, kafe ehoa, tea, esnea, haurrentzako esne hautsa, umeentzako zerealak eta umeentzako potitoak.
  • Osasun materiala: maskara kirurgikoak, gasak, esparadrapoak, zauriak desinfektatzekoak, bendak…
  • Higiene produktuak: pixoihalak helduentzat eta haurrentzat, konpresak, toailatxoak, xaboi pastillak, hortzetako pasta, hortzetako eskuila…
  • Bertzelakoak: Pilak, linternak, luzagailuak, 3 KW-ko sorgailu elektrikoak…

Elikagaiak biltzeko puntuak:

Ibardinen:

Boutique Biok, Nuevo Biok, Biok eta Beola

Dantxarinean:

Felix Benta, Pantxo benta, Arrechea, Josenea, Paco benta, Axular benta, Biok Lapitxuri eta Biok Otxondo.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun