Gure Mendia mugaz gaindiko lankidetza proiektuaren bilera egin zuten astelehenean Beran

Proiektuko parte hartzaileak Beran egindako bileran.

Iazko otsailean Bidasoaren bi aldetan piztutako sutearen ondotik paratu zuen abian Euskal Elkargoak Gure Mendia mugaz gaindiko lankidetza programa. Iparraldetik, Sara, Urruña, Biriatu, Ziburu, Askain, Senpere eta Ainhoa dira proiektuaren parte; Nafarroatik, Urdazubi, Zugarramurdi, Etxalar, Baztan eta Bera.

Iazko otsailean abiatu zuten lankidetza, eta geroztik hiru hilabetetik behin biltzen dira. Bilera horietan azkena egin zuten Beran, pasa den astelehenean eta bertan bildu ziren aipatu udaletako hautetsiak zein teknikari eta suhiltzaileak ere.

Orain arteko bileretan, suteen kontrako babesa, artzaintza eta abeltzaintza, ehiza, larreak, basoa eta landaketak, herri lurren kudeaketa, aisialdia mendian, bioaniztasuna, ondarea, mendiko ordenantza eta araudiak… landu dituzte bertzeak bertze. Azken bileran, aldiz, artzaintzaren inguruko diagnostikoa partekatu zuten. 

Berako Udaletik jakinarazi dutenez, «hagitz  positiboki» baloratzen dituzte lan saioak: «Mugaz bi aldeetako herrien arteko harremanak sendotzen ari gara, eta partekatzen dugun mendia eta natur ondarea modu jasangarrian erabili eta kudeatzeko bidean, aurrerapausoak ematen ari gara».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun