Harakin-ikastaro honetan 12 langabe ari dira parte-hartzen, erdiak emakumeak, Nafarroako iparraldeko hainbat herritakoak eta Iruñekoak. Aitzineko asteotan ikastaroaren alde teorikoa hartu dute eta orain hasi dira haragi-piezen manipulazioari buruzko alderdi praktikoa ikasten.
Gainera, «proiektu honek enpresen beharretara egokitutako prestakuntza espezializatua eta langabetuen enplegua uztartzen ditu. Izan ere, parte-hartzaileen % 40k, gutienez, Venta Peion bertan lan-kontratu bat izateko aukera izanen du, eta hori pizgarri bikaina da haientzat», laburbildu du kontseilariak.
Eduki teorikoak eta praktikoak
Harakin-ikastaroak 235 orduko iraupena du guztira, eta zerbitzarienak, berriz, 175 ordukoa. Bi kasuetan teoria Donezteben irakasten dute eta zati praktikoa Venta Peioren instalazioetan. Ikasleek garraio-beka bat dute, prestakuntza ematen duten lekuraino joateko.
Bi ikastaroek bezeroaren arretari, elikagaien manipulazioari eta frantsesean hasierako mailako modulu bati buruzko prestakuntza eskaintzen dute. Gainera, lanposturako prestakuntza espezifiko gisa, harategiko ikastaroak produktuak saltzeko, prestatzeko eta kontserbatzeko, zatikatzeko, haragi-piezak egiteko eta produktu gordinak, onduak eta egosiak egiteko teknikak erakusten ditu. Zerbitzariei buruzko ikastaroan, berriz, jatetxeko eta tabernetako zerbitzuari buruzko edukiak emanen dira, baita barrako eta jatetxe-salako oinarrizko zerbitzuei buruzkoak ere.