Nafarroako Errepideen Katalogoan sartu berri dituzte Leitzako eta Baztango hainbat errepide

Ttipi-Ttapa 2022ko ots. 13a, 10:00

NA-2596 errepidea, Elizondo eta Beartzun artean

Nafarroako Errepideen Katalogoan sartu eta Herri Lan Departamentuak bere gain hartuko ditu Leitzako eta Baztango hainbat errepide zatiren kontserbazioa eta mantentze-lanak. Nafarroan osotara 48 errepide zati dira katalogoan sartu berri dituztenak, eta horietatik 5 Mugairiko errepide barrutian daude.

Honako hauek dira:

NA-1210 Belateko errepide zaharrean bi zati;
NA-2596 Elizondo eta Beartzun arteko errepidea;
NA-2655 errepidea Otsondoko gainetik Gorramendiko antenaraino;
NA-4015 Leitzako Gorriztaran auzoan eta
NA-4445 errepidea Lekarozko Oharriztik Arrazkazan auzora.

Kontuan hartu behar da Errepideen Katalogoan sartzearekin Herri Lan Departamentuak errepideen kontserbazio integraleko zerbitzua dakarrela berekin, eta zerbitzu horren helburua errepideen egoera egokia, segurtasuna eta erosotasuna zaintzea dela. Konparazio batera, hor sartzen da neguko bideetako eta larrialdiei aurre egiteko jarduerak, galtzadak eta bazterbideak, arekak eta ertzak garbitzea eta drainatze-lanak egitea. Horrez gain, hainbat lan egiten dira: bideko zuloak betetzea, istripuen ondorioz hondatutako balizak eta seinaleak lehenbailehen konpontzea, segurtasun-hesi berriak jartzea, errepide-zoruak sendotzea eta seinale horizontalak eta bertikalak berritzea, eta abar.

Baztango Geroa Baik «gogo onez» hartu du Nafarroako Gobernuaren erabakia

Baztango Geroa Baik «gogo onez» hartu du Herri Lan Departamentuak Nafarroako Errepide Sarearen katalogo ofizialera bide zati berriak sartu izana. Koalizioak prentsara igorritako ohar batean gogorarazi duenez, «Baztango Udaleko osoko bilkurak Geroa Baik bultzaturiko mozio bat aho batez onartu zuen pasa den irailaren 23an». Mozio horretan Aritzakun-Urritzate eta Beartzun auzoetara iristeko errepide zati eta pista ugari errepide Katalogoan sartzea eskatzen zitzaion Nafarroako Gobernuko Herri Lan Departamentuari.

Geroa Baik «poza» agertu du eskaera hau kontuan hartu dutelako. Izan ere, «hobekuntzak behar dituzten bideak dira hauek eta udalak konponbide txikiak egin baditu ere, Nafarroako Gobernuak ezin izan du ekintzarik egin, orain arte bide hauek ez baitziren Nafarroako Errepide Katalogoan ageri. Katalogoan sartuta, egoera honi konponbidea eman zaio».

Gizartea

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun