Beti Gaztek jantzi du Euskal Herriko sokatira txapelketako lehen txapela

Beti Gazteko gizonezkoen zortzikoteak lortu du lehen txapela Euskal Herriko txapelketan, pisurik astunenean.

680 kiloko txapela irabazi zuten gizonezkoek larunbatean Ibarran eta 640 kiloko lehen jardunaldian ere nagusi izan ziren igandean lesakarrak eta hirugarren Amaiur.

Asteburu honetan abiatu da Euskal Herriko goma gaineko sokatira txapelketa eta Beti Gaztek lortu du dagoeneko lehenbiziko txapela. Larunbatean Ibarran (Gipuzkoa) jokatu zen 680 kiloko txapelketa, jardunaldi bakarrean eta lesakarrak gailendu ziren tiraldi guztietan. Zuraide izan zen bigarren, Ibarra hirugarren eta Ñapurrak laugarren. Muruetak ez zuen parte hartzerik izan.

Beti Gazteko zortzikote txapeldunean Karmelo Mitxelena, Lander Landiribar (Amaiur), Oskar Telletxea, Guy Larralde (Ezpeleta), Beñat Ordoki, Beñardo Iantzi, Eneko Saldias eta Julen Palenzuela aritu ziren tiran, Paxkual Taberna entrenatzaile eta Ander Mitxelena laguntzaile zutela.

Euskal Herriko 680 kiloko sokatira txapelketako podioan, Beti Gazte, Zuraide eta Ibarra.

640 kiloko lehen jardunaldia

Biharamunean, Abadiñon (Bizkaia), gizasemeen 640 kiloko lehen jardunaldia hasi zen.  Hemen zortzi talde hasi dira lehian eta hemen ere lesakarrak gailendu ziren tiraldi guztietan. Azpimarratzekoa izan zen Amaiurren jarduna ere, hirugarren izan baitzen, Beti Gazte eta Ibarraren ondotik. Laugarren izan zen Ñapurrak, Abadiñok eta Zuraidek berdindu egin zuten bosgarren postuan, Murueta zazpigarren izan zen eta Txantrea zortzigarren.

Egutegia

Asteburu honetako jardunaldiaren ondotik, urtarrilaren 16an gizonezkoen 640 kiloko bigarren jardunaldia eta emakumezkoen 540 kiloko lehen jardunaldia jokatuko dute Bilboko (Bizkaia) La Casillan. Emakumeen pisu astunean sei talde ariko dira: Beti Gazte, Ibarra, Badaiotz, Abadiño A eta B eta Gaztedi.

Urtarrilaren 22an, gizonezkoen 640 kiloko finala eta emakumeen 540 kiloko jardunaldia jokatuko dituzte Berangon (Bizkaia).

Urtarrilaren 29an, emakumezkoek 540 kiloko azken jardunaldia eta gizasemeek 600 kiloko lehena jokatuko dute Bakion (Bizkaia). Gizonezkoen hamabi talde lehiatuko dira kategoria honetan: Amaiur, Beti Gazte, Ibarra, Txantrea, Abadiño A, Abadiño B, Antsoain, Gaztedi, Ñapurrak, Murueta, Goiherri eta Berriozar.

Otsailaren 5ean Erandion (Bizkaia), gizasemeen 600 kiloko bigarren jardunaldia eta emakumeen 500 kiloko lehena jokatuko dute. Emakumeen pisu arinean hamar talde ariko dira nor baino nor gehiago: Amaiur, Beti Gazte, Ibarra, Txantrea, Badaiotz, Abadiño A, Abadiño B, Antsoain, Gaztedi eta Berriozar.

Otsailaren 12an jokatuko dute gizonezkoen 600 kiloko hirugarren eta azken jardunaldia eta emakumezkoen 500 kiloko bigarrena, oraindik zehaztu gabe dagoen herrian.

Otsailaren 19an, txapelketa mistoa (580 kilo) erabakiko da egun bakarrean, Ibarran (Gipuzkoa). Txapelketa mistoan hamar talde ariko dira: Amaiur, Beti Gazte, Ibarra, Txantrea, Bizindar, Abadiño A, Abadiño B, Antsoain, Gaztedi eta Berriozar.

Otsailaren 26an, azkenik, emakumezkoen 500 kiloko hirugarren eta azken jardunaldiaz gain, gizonezkoen 560 kiloko txapela jokatuko da egun bakarrean Ibarran (Gipuzkoa). Etxeko taldearekin batera, Beti Gazte, Txantrea, Abadiño, Gaztedi, Ñapurrak, Murueta, Goiherri eta Berriozar ariko dira, bederatzi talde denera.

 

Munduko txapelketa bertan behera

Martxoaren 3tik 6ra Munduko txapelketa jokatzekoa zen Herbehereetako Doetinchem hirian. Bertan parte hartzeko asmotan zen Beti Gazte, ez ordea Amaiur. Halere, osasun egoera dela eta, txapelketa bertan behera utzi dute.

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun