Laxoa Elkarteak aste honetan ustekabean iragarri duenez, Nafarroako 22. paxaka txapelketako ilbeltzaren 16ko final handia Abu Dhabin (Arabiar Emirerri Batuak) jokatuko dute, Louvre Abu Dhabi museoko areto batean egokituko duten 20x70 metroko kantxa batean. Paxaka txapelketako lehen fasea akitu zen joan den astean eta txapelketako ia partida gehienak bezala Iruritako Aranabia pilotalekuan jokatu zituzten. Bakar batzuk, hezetasunagatik, Erratzun ere jokatu dituzte txapelketa honetan. Ilbeltzaren 2ko final laurdenak eta ilbeltzaren 9ko finalerdiak ere Iruritan jokatuko badituzte ere, final handia, beraz, Abu Dhabin izanen da. Han ez dute hezetasun arazorik espero.
Ameriketako Estatu Batuetatik herrialde arabiarretara
Ezusteko albiste honek bere arrazoiak ere baditu. Aurten itxi dute Ameriketako Estatu Batuetan zesta-punta apustuak hartzen zituen azken pilotalekua, Floridako Dania Jai Alai, eta, nonbait, pilotaren lekukoa arabiar herrialdetara eramateko apustua egin nahi dute bertako hainbat jekek. Jakina da jeke hauek dirutza inbertitu dutela futbolean eta bertze hainbat kiroletan, baina euskal pilota dute hurrengo jomuga eta nonbait, paxaka izanen da lehen saiakera, «joku ikusgarria delako, alde batetik, eta arabiar herrialdeetan jarraitzaile aunitz dituen tenisaren antza duelako, bertzetik», Ahmed Salah Berry, Abu Dhabiko kirol ministroak adierazi duenez. Halere, ez dute baztertzen paxakaren ondotik, zesta-punta bera, erremontea, pala edo esku pilota partidak herrialde arabiarretara eramatea.