Cortesko Adierazpena, 2021eko azaroaren 13a: ¡Que viva el euskera! De Cortes a Bera, Vianatik Gardera

Ttipi-Ttapa 2021ko aza. 9a, 07:45

Erdialdeko eta Erriberako nafar talde bat gara, eta azaroaren 13an, larunbatean, euskararen aldeko adierazpen bat eginen dugu Cortesen, hizkuntza-zonifikazioa gainditzeko pausoak emateko helburuarekin. Adierazpen honen aurkezpena bidaltzen dizuegu. Gustatuko litzaiguke adierazpen hau izatea Nafarroa osora hedatuko den dinamika anitz eta zabal baten hasiera.

 

1)  Cortes aukeratu da, behetik gora doan dinamika izatea nahi delako, bai eta zonifikazioak kaltetuenetatik abiatzea ere.

Azaroaren 13an Cortesen (1) euskararen aldeko adierazpen bat eginen da. Adierazpen horretan, euskara aldarrikatuko da Nafarroako berezko hizkuntza gisa, eta eskatuko da Erriberak eta Erdialdeak jasaten duten bereizkeria behingoz bukatzeko. Adierazpenaren helburua da pertsonak eta eskubideak erdigunean paratzea eta euskara Nafarroa osoko parte gisa aldarrikatzea. Garrantzitsua da zonifikazioarengatik kaltetuenak diren pertsonak mintzatzea, eta beraiek izatea nafar guztien hizkuntza eskubideak errespetatuko dituen irtenbide baten beharra agenda politikoan jarriko dutenak.

Adierazpena ez dago gaur egungo dinamika baten barnean. Izan ere, dinamika berri bati ekin nahi zaio, Erriberan zein Nafarroa osoan euskararen aldeko indar posible guztia bilduko duena. Ildo horretan, euritako moduko bat sortuko da, eslogana eta izen propioarekin (Cortesen ezagutaraziko da), aurrerantzean Nafarroan zehar egin daitezkeen ekimenak bateratzeko balio izanen duena. Hasiera batean, Cortesko adierazpenak izaera komunikatiboa izanen du, baina espero izatekoa da aurrerago gizartean eta komunikabideetan oihartzun handiagoa duten ekitaldiak antolatu ahal izatea.

Eguneko egitaraua:

  • 10:00 Pilota-partida Retegi pilotalekuan (Udaletxe plazan)
  • 11:30 Jendearen elkartzea frontoian
  • 12:00 Adierazpena frontoian
  • Musika
  • Jotak
  • Dantza
  • Adierazpenaren irakurtzea (12:20)
  • 12:30 Txistor jatea

 

Hordago Nafarroa

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun