Nafarroako Bertsolari Txapelketa 2021

Nafarroako Bertsolari Txapelketako lehenengo finalaurrekoa jokatuko dute astelehenean Altsasun

Ttipi-Ttapa 2021ko urr. 28a, 18:00

Altsasuko Iortia Kulturgunean izango da saioa 17:30ean. Sarrerak bertsosarrerak.eus atarian erosi daitezke.

Finalerdiak bukatuta, finalaurrekoetan da Nafarroako Bertsolari Txapelketa. Azaroaren 1a, astelehena jokatuko da lehen finalaurrekoa Altsasun. Bertan ariko dira kantuan  Ekhiñe Zapiain Arlegi, Endika Legarra Nuin, Eneko Fernandez Maritxalar, Erika Lagoma Pombar, Oier Lakuntza Irigoein eta Xabat Illarregi Marzol bertsolariak Fernando Anbustegi Goñi jartzaile dutela.

Fasez aldatuta, bertsolariek egin beharreko lanak ere aldatuko dira. Denera, hamalu bertso puntuagarri kantatu beharko dituzte. Hauek dira egin beharreko lanak:

  • Binaka, gaia emanda, hiruna bertso zortziko handian
  • Binaka, gaia emanda, hiruna bertso zortziko txikian
  • Binaka, gaia emanda, hiruna bertso hamarreko txikian

Kartzelako lana

  • Banaka, lehen puntua emanda, bi bertso zortziko txikian
  • Banaka, gaia emanda, hiru bertso nahi den doinu eta neurrian

Saioa irabazten duena zuzenean igaroko da azaroaren 28an Iruñean jokatuko den finalera. Gainontzekoek, bertze bi finalaurrekoetako emaitzen zain gelditu beharko dute. Azaroaren 6an Burlatan eta azaroaren 14an Leitzan jokatuko dira hurrengo bi finalurrekoak. 

Altsasurako sarrerak dagoeneko eskuragarri daude bertsosarrerak.eus atarian. Egunen bertan sarrerarik gelditzen bada Iortia Kulturguneko lehiatila irekiko dute 16:00etan.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun