Emakumezkoen Euskal Herriko harri-jasotze eta aizkora txapelketak jokatuko dituzte urriaren 24an, igandean 12:00etan, Mungiako (Bizkaia) Matxin plazan. Harri-jasotzen ez da eskualdeko ordezkaririk izanen, baina sei aizkolarietatik hiru eskualdekoak izanen dira: Maika Ariztegi iturendarra, Nerea Sorondo beratarra eta Xanta Sousa lesakarra.
Txapelaren bila lehiatuko diren bertze aizkolariak Beatriz Tanco nafarra, Uxue Ansorregi bizkaitarra eta Laiene Pikabea gipuzkoarra izanen dira. Aizkolari bakoitzak bosna enbor moztu beharko ditu, 36 ontzako bi enbor, 45 ontzako bi enbor eta kanaerdiko bat (54 ontzakoa).
Harri-jasotzen ere sei emakume
Euskal Herriko harri-jasotze txapelketan sei emakume ariko dira, hiru bizkaitar (Karmele Gisasola, Lucia Orbe eta Marina Blanco) eta hiru gipuzkoar (Aroa Sanchez, Naiara Zumeta eta Udane Ostolaza). Hiruna minutuko txandatan 75 kiloko zilindroarekin, 62,5 kiloko kuboarekin eta 62,5 kiloko bolarekin ariko dira.