Klima aldaketaren ondorioz tenperatura igotzen ari da eta bide beretik, itsas mailak ere igotzen segitzen du. Aste honetan Climate Central zentroak lau gradurainoko igoerak mundu osoan nolako eragina izanen lukeen azaleratu du mapa baten bitartez eta urak zer lur estaliko lituzkeen zehaztu du. Horren arabera, Euskal Herriko hainbat bazter ur azpian geldituko lirateke, eta horien artean, eskualdean, Bidasoa eta Urdazuri ibaien bazterretan sumatuko lukete eragin handiena.
Adibidez, tenperatura hiru gradu igoko balitz, Bidasoa ibaiaren ondotik pasatzen den trenbidean, bertzeak bertze, Antzuzelai inguruan urak nabarmen eginen luke goiti, eta Zalain Zokoko zenbait puntutan bide berdea urak hartuko luke. Bortzirietatik hurbil, Behobia, Hendaia, Irun eta Hondarribiko hainbat toki ere urak estaliko lituzke.
Urdazuri ibaiaren bazterretan ere eragin handia izanen litzateke eta Senpereraino sumatuko lukete. Tenperatura hiru gradu igota, Donibane Lohizuneko, Azkaingo eta Senpereko etxe, negozio eta bertzelako hainbat eraikin urpean geldituko lirateke.
Horrez gain, mundu osoko hainbat irudi ere ikusgai paratu dituzte Climate Centralen webgunean. Horien artean, eskualdetik hurbil, Angeluko (Lapurdi) irudi hau ageri da.
