Aurreko urtean hasitako bideari jarraipena emanez euskarazko IKTen inguruko doako ikastaro-ziklo bat abian jarri du Sarean euskaraz-ek. Horietako hiru izanen dira eskualdean.
Memeak egiteko ikastaroa
Memeak egiteko ikastaroa eginen dute datorren ortzegunean, urriaren 21ean Elizondoko Arizkunenean. Bi orduko ikastaroa izanen da 17:00etatik 19:00etara. Bertan, memeak sortu eta zabaltzeko azalpenak, jarraibideak eta trikimailuak eskainiko dira.
Memeak umorezko mezu sinpleak izaten dira. Jatorrizko irudi, bideo edo testu baten remix satirikoak izaten dira, eta zabalkuntza handi eta azkarra izaten dute normalean.
Argazkilaritza mugikorrean, Instagram baino gehiago
Mugikorreko kamerari probetxua nola atera erakutsiko dute datorren ortzegunean Aresoko udaletxeko erabilera anitzeko gelan egingo duten ikastaroan. Ikastaroa 17:30etatik 19:30etara izanen da.
Youtuber izateko mila modu
YouTube plataforma ezagutarazteaz gain, bideoak euskaraz sortzen, editatzen, produzitzen eta post-produzitzen ikasiko dute Lesakan egingo duten ikastaroan. Sei orduko ikastaroa izanen da, bi egunetan banatuta. Urriaren 28an izango da lehen saioa, eta azaroaren 4an bigarrena. Bi ikastaroak 17:00etatik 20:00etara izanen dira.
Ikastaroa youtuber izan nahi dutenei zuzenduta dago eta helburua YouTuben dauden genero eta kanalak ezagutaraztea da. YouTuben aritzeko trikimailuak, arrakastarako gakoak, modako gaiak eta editatzeko teknikak erakutsiko dituzte, eta parte hartzaile bakoitzak bere kanal propioa sortuko du.
Ikastaroan bertzeak bertze Ane Atxutegi eta Ane Iturriarte youtuberrek parte hartuko dute.