Ipar Martxako Espainiako Kopan hirugarren eta laugarren gelditu dira Ramontxo Arandia eta Jon Medrano

Joan den igandean jokatu zen Sevillan Ipar Martxako Espainiako Kopako laugarren eta azken proba eta Ramontxo Arandia eta Jon Medrano elizondoarra ederki moldatu ziren. Kopa bukatuta kategoria absolutuan hirugarren izan da Arandia eta beteranoetan bigarren. Medrano, berriz, laugarren kategoria absolutuan eta bigarren seniorren mailan.

Ekainaren 4an Gasteizen (Araba), irailaren 5ean Azagran (Nafarroa), irailaren 19an Valladoliden (Espainia) eta urriaren 3an Sevillan (Espainia) jokatu dira aurtengo Ipar Martxako Espainiako Kopako probak eta eskualdeko kirolariek emaitza onak lortu dituzte.

Ramontxo Arandiak, erraterako, lau probetatik hiru jokatuta (Gasteizen, Valladoliden eta Sevillan), 259,6 puntu eskuratu ditu eta gizonezkoen sailkapen orokorrean hirugarren gelditu da. Beteranoen A mailan, berriz, bigarren izan da.

Jon Medranok, berriz, lau probetan parte hartu du eta 230,4 puntu eskuratu ditu guztira, gizonezkoen sailkapen orokorrean laugarren postua eskuratuz, eta seniorretan bigarrena.

Ainara Unanua gartzaindarrak, berriz, Azagrako proban parte hartuta 64. gelditu da emakumezkoen sailkapen orokorrean eta zazpigarrena senior mailan.

Alejandro Ordoki lesakarrak, bertzalde, kopako lau probetan parte hartu du eta 68. gelditu da gizonezkoen sailkapen orokorrean eta seigarren beteranoen C mailan.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun