Baztan-Errekako laxoa kopa torneoko lehen finalista erabaki da Arraiozen

Oizko laxoa desafioan parte hartu zuten pilotariak, afaria jokoan.

Horretaz gain, Oizen laxoa desafioa eta gazteen txapelketako lehen faseko azken partida ere jokatu dituzte asteburu honetan.

Laxoa Elkarteak antolatutako Baztan-Errekako kopa torneoko lehen finalerdia irailaren 11n, larunbat arratsaldean jokatu zuten Arraiozko plazan. Lehen partida horretan, Xabier Bengoetxea (Arraioz), Ramontxo Etxebeste (Doneztebe), Iñaki Etxandi (Irurita) eta Aritz Alunda (Arraioz) laukoteak erraz irabazi zion Jon Apeztegia (Doneztebe), Aitor Zubigarai (Arraioz), Jokin Apezetxea (Doneztebe) eta Mikel Sagaseta (Irurita) laukoteari, 9-2.

Bigarren finalerdia datorren larunbatean

Irailaren 18an, larunbatean 17:00etan jokatuko dute bigarren finalerdia Mikel Mindegia (Arraioz), Josu Juanena (Doneztebe), Joseba Juanena (Doneztebe) eta Oinatz Jautsaratsek (Irurita), Ioritz Zelaieta (Oiz), Gorka Urtasun (Irurita), Iñaki Maylin (Doneztebe) eta Jon Gamioren (Arraioz) kontra.

Bi partidetako irabazleek finala irailaren 25ean, 17:00etan jokatuko dute Arraiozko plazan.

 

Laxoa desafioa Oizen

Bertzalde, larunbat arratsaldean Oizko plazan, besten seinale bezala, kuadrillen arteko laxoa desafioa jokatu zen, afariak jokoan. 

G. Mindegia (Doneztebe), A. Arozena (Doneztebe), I. Zelaieta (Oiz), A. Berasategi (Doneztebe) laukoteak 9-7 irabazi zion I. Juanena (Doneztebe), L. Zelaieta (Oiz), B. Alzugarai (Gaztelu), J. Apeztegia (Doneztebe) laukoteari.

Sekulako giroa sortu zen, ehun bat gazte bildu ziren plazan, megafonia, partidaren tartetan musika, hidratazioa (zerbezak)...

 

Gazteen txapelketa azken txanpan

Gazteen laxoa txapelketaren barrenean igandean jokatu zen lehen faseko azken partida: Irurita B 9 - Oiz 8. Partida hau Iruritako plazan jokatu beharrean Arraiozko plazan jokatu behar izan zuten, Iruritan auto bat zegoelako plazaren erdian. Oizko taldea zuzenean finalerako sailkatu da; finalerdia (partida bakarrera) igande arratsaldean 5etan Iruritan jokatuko dute Irurita A eta Irurita B taldeek. Finala Arraiozko plazan jokatuko dute irailaren 25an, 11.30ean, beraz, Oizek eta Iruritako talde batek.

 

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun