Elizondoko patruila batek ibilgailu baten atoian abandonatu zuten zakur deshidratatu bat erreskatatu zuen atzo Oronozen. Herritar batek deitua zien abisatuz Oronozen bazegoela ehiztariek zakurrak eramateko erabiltzen duten kutxa baten barnean zakur bat, eta zegoen bezala egonik, haren bizia arriskuan zegoela. Foruzainek egiaztatu zuten zakurra aireztapen eskaseko kaiola baten barnean zegoela eta 30 graduko tenperaturan zegoela kanpoan. Animaliak erantzuten ez zuela ikusita, kaiola ireki zuten.
Barnean ehiza-zakur bat zegoen, deshidratatua eta beroarekin ia itoa. Kaiolatik atera eta freskatzen hasi ziren urarekin bustiz eta edatera ematen saiatuz. Hasieran ez omen zuen bizi seinalerik ematen baina, handik gutira, bizkortzen eta indarberritzen hasi omen zen.
Zakurraren jabea agertu zenean, aitortu zuen ehizian ibilia zela eta, gero, itzuli zenean, ibilgailua itzalean utzi zuela. Foruzainek jakinarazi zioten salaketa jarriko ziotela konpainiako animaliei buruzko 19/2019 Foru Legeari egindako balizko urratze baten ondorioz, arduragabekeria larri bat egon zitekeelako eta zakurraren bizia arriskuan jartzeko moduan utzi zuelako kaiolaren barnean eguzkitan.