Irurita Miguelenek eta Arraioz Sagardiak jokatuko dute laxoa txapelketako finala

Ttipi-Ttapa 2021eko abuztuaren 2a

Arraiozko plazak hartuko du 41. laxoa txapelketako finala larunbat arratsaldean.

Abuztuaren 7an, larunbat arratsaldean jokatuko dute Arraiozen eta goizean hirugarren posturako lehia izanen dute Doneztebe Apezteguiak eta Oizek

Igande arratsaldean osatu dira Baztan-Errekako 41. laxoa txapelketako final erdiak. Bigarren finalerdian joaneko partidan, joan den asteazkenean Doneztebe Apezteguiak 3-9 galdu egin zuen Irurita Miguelene taldearen kontra Bear Zana plazan. Larunbat arratsaldean hasi egin zen itzuliko partida Iruritako plazan, baina joko bat jokatu ondotik partida bertan behera utzi behar izan zen euria hasi zuelako. Igande arratsaldean segitu zuen partidak eta berriz ere Irurita Miguelelenek irabazi zion Doneztebe Apezteguiari, 9 eta 5. Beraz, finala abuztuaren 7an, larunbatean 17:30ean jokatuko dute Arraiozko plazan herriko taldeak, Arraioz Sagardiak eta Iruria Miguelenek. Larunbat goizean, 10:30ean, hirugarren posturako lehia izanen dute Doneztebe Apezteguiak eta Oizek.

Gaztetxoen txapelketako finala abuztuaren 13an

Gaztetxoen laxoa txapelketa ere azken txanpan sartua da eta finalistak erabaki dira. Ortzegunean jokatu zen ligako bosgarren jardunaldia.

Irurita B - Doneztebe A: 2 - 7

Doneztebe C - Irurita A: 7 - 4

Sailkapena:

1- Doneztebe C, 4 puntu. 2- Doneztebe A, 3 puntu. 3- Irurita A, 2 puntu. 4- Irurita B, puntu 1. 5- Doneztebe B 0 puntu.

Sailkapen horren arabera, azken partidak abuztuaren 13an, ortziralearekin jokatuko dituzte Donezteebeko Bear-Zanan. 16:00etan hirugarren postua erabakitzeko partida jokatuko dute Irurita Ak eta Irurita Bk eta ondotik, 17:30ean, final nagusia jokatuko dute Doneztebe Ck eta Doneztebe Ak.

Kirola Baztan Malerreka

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun