San Fermin txapelketako B mailako finalean lehiatuko dira gaur Oskar Urrutia saldiastarra eta Aritz Zubiri goizuetarra

Ttipi-Ttapa 2021ko uzt. 14a, 09:00
Deskargatu Info Ahotsak :
es en fr

Gaur Galarretan Urrutia II eta Martirenaren aurka ariko dira Loitegi eta Zubiri
Urriza-Aizpuru III.ak, Ansa II-Labakaren kontra jokatuko dute gaur A finala eta Urrutia II-Martirenak, Loitegi-Zubiriren aurka, B mailakoen finalean.  Argazkiak: Maialen ANDRES.

San Fermin txapelketa urtero Uharteko Euskal Jai frontoian jokatu izan da, baina pandemiaren eraginez, 2021ean Galarretan ari dira jokatzen.

Bi final dira, A eta B, eta azken honetan Zubiri goizuetarrak txapela irabazteko aukera izanen du. Loitegirekin batera, atzelari goizuetarrak Urrutia II.a eta Martirenaren aurka ariko dira jaialdiko hirugarren partidan. Ligaxkako azken jardunaldian Loitegi eta Zubirik 27-30 irabazi zuten, baina Urrutia II eta Martirenak finalerako txartela lortua zuten, 27-26 aurreratu zirenean.

Final nagusia, Urriza eta Aizpuru III.ak, Ansa II eta Larrañagaren aurka jokatuko dute jaialdiko bigarren partidan. Urriza aseezina da eta azken txapela guztiak irabazi eta gero, beste bat lortu nahi du. Orain gutxi Sagardoaren Txapelketan Urriza eta Ansaren arteko finala jokatu zen eta berriz errepikatuko da aurrelari berdinen borroka. Hala ere, oraingoan atzelariak ezberdinak dira. Orduan Zaldua eta Labaka ziren bikotekideak eta oraingoan maila altuagokoak dira. Ligaxkan Urriza eta Aizpuruk 30-25 garaitu zituzten Ansa eta Larrañaga, baina Juanenea eta Barrenetxeak ere garaitu zituzten ligaxkan eta ondotik finalerdian beraiek irabazi zuten. Partida parekatua espero da.

Finalerako pilotak aukeratu dituzte

Lau bikoteek materiala aukeratu dute, Galarretan bertan. Bakoitzak gehien komeni zaion materiala banatu zuten saskitik. Hasieran B finalekoek aukeratu dituzte lau pilotak. Urrutia II eta Martirenak 128 gramoko bi eta 127 gramoko beste bi. Ondotik Zubiri bakarrik aritu da eta 19 gramoko bi, 127ko eta 126ko bana aukeratu ditu.
 
Ondotik A finalekoen txanda etorri da. Urrizak Urrutiaren laguntza izan du aukeraketan, Aizpuru ezin izan baitu egon. 127 gramoko hiru eta 128ko bat aukeratu ditu.
 
Ansa eta Larrañagak, Urriza jokoan ahalik eta gutxien sartzeko lau pilota aukeratu dituzte; 128 gramoko hiru eta 126 gramokoa bestea.
 

Galarretan, uztailaren 14an (asteazkena), 17:00etatik aurrera

  1. Juanenea-Murgiondo – Segurola-Labaka, 30 tantora
  2. Urriza-Aizpuru III.a – Ansa II-Larrañaga, 30 tantora, SAN FERMINETAKO FINALA
  3. Urrutia II.a-Martirena – Loitegi-Zubiri, 30 tantora. SAN FERMINETAKO FINALA

 

Kirola

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun