Euskal Herriko 33 kolektibo biltzen dituen Bizitza plataformak Hitza plazaz plaza izeneko ekimena abiatu du. Hala, koronabirusari eta horren kudeaketari buruzko informazioa emanen du hiru asteko ibilaldian, 42 herri bisitatuz. Plaza guztietan hainbat adituk parte hartuko dute, bizi dugun egoerari buruzko ezagutza suspertu nahian.
Egitasmoa uztailaren 3an, larunbatean, abiatuko da eta 24ra arte luzatuko da. Bien bitartean, plazaz plaza «gizarte osasuntsuagoaren mesedetan» adierazpenak eginen dituzte, «goizez herri batean eta arratsaldez bestean». Karabana herrian barna ibiltzeaz gain, «adierazpen aske eta irekirako guneak» sortuko dituzte.
Uztailaren 19an, 18:00etan Elizondon izanen dira; 20an, 12:00etan Donezteben eta arratsaldean, 18:00etan, Leitzan; eta 21ean, 12:00etan Beran. Hilaren 24an, 12:00etan, Donostian eginen den manifestazioarekin borobilduko dute ekimena.