Urrezko Banakako Aizkolari Txapelketako hogeita laugarren edizioko finalerdia jokatuko dute maiatzaren 30ean, igande eguerdian Gasteizen. Sei aizkolari ariko dira lehian ekainaren 13an Azpeitian jokatuko den finalerako hiru txartelen bila. Tartean izanen dira Zigako Joxean Etxeberria eta Zubietako Patxi Mindegia. Ez ordea Julen Olano leitzarra, ezin izan baitzuen joan den igandean Lekunberrin jokatutako kanporaketa gainditu.
Etxeberria eta Mindegiarekin batera, Hodei Ezpeleta (Eibar), Oier Kañamares IV.a (Arostegi), Xuban Kañamares V.a (Arostegi) eta Ibai Soroa (Arribe-Atallu) ariko dira lehian.
Harri-jasotzen azken kanporaketa
Hiru hamarreko harri-jasotze txapelketako bosgarren eta hondarreko sailkapen-jardunaldian 125na kiloko harri zilindrikoarekin, kubikoarekin eta borobilarekin neurtuko dituzte indarrak Mikel Lopetegi Urra zarauztarrak, Beñat Telleria lasartearrak eta Iñigo Eizagirre Eiza zarauztarrak. Hauekin batera, Aimar Galarraga oriotarra eta Otxandioko Urdax Magunazelaia aritu dira txapelketan eta bi jardunalditan kilo gehien altxa dituzten hiru harri-jasotzaileak izanen dira Azpeitiko finalean.