EHZ festibala uztailaren 2tik 4ra iraganen da Irisarrin

Ttipi-Ttapa 2021ko mai. 22a, 08:00
EHZ festibaleko kideak Irisarrin eskaini duten prentsa agerraldian

Osasun neurri bereziekin bada ere, EHZ festibalaren 25. edizioa uztailaren 2tik 4ra iraganen da aurtengoan. Bertzeak bertze, Ruper Ordorika, Chill Mafia, Potato, Kuartz, Torheit eta Pirritx, Porrotx eta Marimototsek baieztatu dute parte hartuko dutela.

Osasun krisiak ez du oztopatuko EHZ festibalaren 25. edizioa. 1996an Arrosan hasitako abenturak Idauze-Mendi, Heleta eta Lekorne izan ditu topaleku, eta duela bi urte bezala, aurten ere Irisarrin iraganen da kultura eta auzolana ardatz dituen ekimena. Hori bai, bertaratu nahi duenak, antolakuntzak plantan emaniko osasun neurriak bete beharko ditu.

Antolatzaileek onartu dutenez, «etxeratze agindu, konfinamendu eta bestelako neurriekin ez da erraza izan aurtengo festibala irudikatu eta uztaila hastapenerat proiektatzea». Halere, ez dute dudarik izan eta urte hastapenetik hamarka laguntzaile lanean aritu dira «testuinguru berezi honetan kulturari eta euskarari arnasgune baten emateko».

«Osasun pasea» beharko da

Bere izpirituari jarraikiz, EHZ «topagune, saretze eta sozializatzeko espazio bat» izatea nahi dute, «euskara komunikatzeko eta harremantzeko hizkuntza gisa hartuz». Edozein gisaz, osasun neurriengatik baldintza berezietan iraganen da aurtengo festibala eta antolatzaileek Baionako suprefeturarekin hainbat xehetasun zehazten ari direla jakinarazi dute.

Jadaneko jakina da «osasun pase» bat aurkeztu beharko dela sartzean, hots, 48 orenen barnean negatiboa eman duen PCR probaren ziurtagiria edo txertatua izaitea. Hori gabe ezin izanen da sartu. Musukoa nahitaezkoa izanen da eta ekimenak xutik ikusten ahalko dira, jatekoak eta edatekoak ere izanen direlarik.

Programazioa aitzinatzen

Antolatzaileek aurtengo edizioan parte hartuko duten artista eta taldeen lehen baieztapenen berri eman dute. Hala, musikari loturik, Ipar Euskal Herrian lehen aldikoz ikusi ahalko da eszena gainean Iruñeko Chill Mafia taldea. Ruper Ordorika ere Irisarrin izanen da, eta baita Potato talde mitikoa, disko berria plazaratu duen Kuartz eta Torheit Garazi aldeko metal taldea ere. Horiek dira iragarritako lehenak, baina gehiago izanen dira.

Usaian bezala, festibalak musika gaindituko du eta antzerki, zirku edota dantza ikusgarriak ere izanen dira. Pirritx, Porrotx eta Marimotots pailazoek ttipienei eta baita helduei ere bizi poza sortzen entseatuko dira. Hatz(a)markaren poesia, kantu eta antzerki ikusgarria eta Tio Teronen Semeak dantza taldea ere baieztatuak dira.

Horiez gain, hitzaldi eta mahai inguruak proposatuko dituzte festibalera hurbiltzen diren jendeek gogoetarako eta eztabaidarako parada ukan dezaten. Kultura, etxebizitza, krisia, nazio askapena eta EHZren 25 urteko ibilbidea dira landuko dituzten gaiak.

Hiru egunetarako 150 sartze salgai dira EHZren web atarian 35 eurotan. Ondoko salmenta 45 eurokoa izanen da eta iaz txartela erosi zutenek aurten baliatu ahalko dute. Egunez eguneko sartzeak ere izanen dira eta heldu den astetik goiti laguntzaile izateko izen-ematea abiaraziko dute.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun