XI. Sagardoaren Txapelketan kontuak beltz jarri zaizkie Juanenea eta Zubiriri

Ttipi-Ttapa 2021ko mai. 12a, 18:00
Finalerdietara ailegatzeko aukera gutti gelditzen zaie Juanenea eta Zubiriri.

Astelehenean jokatutako hirugarren partida ere galdu egin zuten Urriza eta Zalduaren kontra

XI. Sagardoaren Txapelketan lehian ari diren sei bikoteetatik lauk lortuko dute finalerdietarako txartela eta lehenbiziko hiru partidak galduta, kontuak beltz jarri zaizkie Larre-Gain sagardotegiaren izenean ari diren Aritz Juanenea saldiastarrari eta Aritz Zubiri goizuetarrari. Astelehenean jokatutako partidan aunitz estutu zituzten Urriza eta Zaldua, baina azkenean 30-28 galdu zuten.

Aitzinetik, 30-26 galdu zuten Ansa II.a eta Labakaren kontra eta 24-30 Goikoetxea eta Aizpuru III.aren kontra. Gauzak honela, 4 puntu bertzerik ez dituzte Juanenea eta Zubirik eta finalerdietara sailkatzeko aukera gutti. Falta zaizkien bi partidak irabazi eta 4 puntuak eskuratu ez ezik, tanto guttitan utzi beharko lituzkete arerioak, hauek 0 puntu edo puntu negatiboa izateko. Euskal Telebistak ematen ditu partida guztiak, astelehen gauetan, Erremontari saioan.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun