Eskualdeko pilotariak izan dira asteburu honetan Iruñean jokatu den Espainiako klub arteko pilota txapelketako azken partidetan, baina ez du bakar batek ere txapelik lortu. Halere, finalista izan ziren Julen Retegi eratsundarra buruz buru eta Oian Canabal igantziarra binaka.
Finalerdietako erronkarik zailena Zugarralde klubean ari den Ugaitz Elizalde iturendarrak zuen, buruz buruko txapelketan. Berriki arte profesional izan den eta berriz ere hastekotan den San Cosme taldeko Victor Estebanen kontra aritu zen ortziralean San Juanen eta 2-0 galdu zuen (10-1, 10-2). Markagailuak erakusten duen bezala, erabat nagusitu zen errioxarra. Buruz buruko bertze finalaurrekoan, Irurtzun taldeko Julen Retegi eratsundarrak 2-0 irabazi zion Huarte taldeko Espinali (10-8, 10-6).
Eskuz binakako txapelketako lehen finalerdian, Oberenako Oian Canabal igantziarrak eta Iruritak 2-0 irabazi zieten Urbiongo Cabrerizo eta Iturriagari (10-2, 10-7). Bertze finalerdian, Uharteko Laso eta Beroizek 2-0 irabazi zieten Buruzgaingo Iriarte eta Sarasari (10-5, 10-5).
Gauzak honela, igandean Labriten jokatu zituzten finalak eta pronostikoak bete ziren. Buruz burukoan Victorrek 2-0 irabazi zion Julen Retegiri (10-4, 10-7) eta binakakoan, Laso eta Beroizek ere 2-0 irabazi zieten Canabal eta Iruritari (10-6 eta 10-4).