Espainiako klub arteko pilota txapelketako azken fasea jokatuko dute asteburuan Iruñean. Esku pilotari dagokionez, eskualdeko pilotariak izanen dira gaur arratsaldean San Juan pilotalekuan jokatuko dituzten finalerdietan: Ugaitz Elizalde iturendarrak, Julen Retegi eratsundarrak eta Oian Canabal igantziarrak izanen dute igandean Labriten jokatuko diren finaletarako sailkatzeko aukera.
Buruz buru, Zugarralde klubean ari den Ugaitz Elizalde iturendarra, berriki arte profesional izan den Victor Estebanen kontra (San Cosme) ariko da 17:00etan. Ondotik, Uharteko Iker Espinal, Irurtzun klubean ari den Julen Retegi eratsundarraren kontra ariko da. Eskuz binakako pilota txapelketan, berriz, Oberenako Oian Canabal igantziarra eta Josu Irurita, Urbiongo Cabrerizo eta Iturriagaren kontra ariko dira lehen finalerdian. Bertzean, Uharteko Unai Laso eta Mikel Beroiz profesional ohiak, Gaskueko Ibai Iriarte eta Joseba Sarasaren kontra ariko dira.