Hemen da berriz Errigoraren Nafar hegoaldeko uzta eskutik eskura kanpaina. Martxoaren 4tik 24ra bertako oliba-olio birjina estra (5 litroka) eta kontserba, arroz eta pasta- sortak (12 unitateka) eskatu ahal izanen dira, euskaraz etiketatuta eta ekoizlearen jatorrizko prezioan. «Ekoizteko erak alda daitezen, kontsumitzeko moduak aldatzeko bide bat proposatu nahi dugu. Izan ere, gaurko kontsumoaren araberakoa izanen da biharko ekoizpena», diote.
Banaketa apirilaren bigarren hamabostaldian eginen dute eta, salbuespenak salbuespen, produktu guztiak aldi berean jasoko dira. Eskaera egiterakoan aukeratu behar da produktuak jasotzeko puntua eta bertan zehaztutako egun eta ordutegian pasa beharko da jasotzera. 200 bat herritan daude banaketa guneak. Ordainketa txartel bidez egiten dutenen kasuan, bi zatitan ordaintzeko aukera izanen da (erdia martxoan eta bigarren zatia apirilean). Hala egiten ez duenak, dena batera ordainduko du, eskudirutan, produktuak jasotzean. Hau guztia auzolanean antolatzen da. Hain zuzen, herriz herri informazioa zabaltzen, eskaerak bideratzen eta produktuak biltegiratu eta banatzen ari direnen lan boluntarioari esker, norbere herrian jaso daitezke produktuak ekoizlearen jatorrizko prezioan. Hau da, «olio-errota edo kontserba- etxera joanda ordainduko zenukeen prezio berean».
Ttipi Txartela dutenen artean lehiaketa
Azken urteetan, Ttipi-Ttapako harpidedunak zuzenean sartzen ziren Errigorako saskien zozketan. Aurten, Meknaren bidez harpidetza egin dutenek erran.eus webgunearen bitartez lehiaketa batean parte hartu beharko dute eta bertan proposatuko diren kanpainari buruzko hiru galderei erantzun. Zuzen erantzuten dutenen artean eginen da zozketa.