Datorren ilbeltzaren 27an, 18.30ean online bidez eskainiko da jardunaldia. Enpresa edo proiektuek sarean argitaratzea eta bide horretan aholkatzea da jardunaldiaren helburua. Edizio honetan, zehazki, komunikazioaren krisia eta krisien komunikazioa dira hizpide.
Hizlariak
Hiru zati nagusi izanen ditu jardunaldiak; hizlariak, solasaldia eta eztabaida gunea. Saioaren lehen zatia bi hitzaldik osatuko dute. Hasteko, Lineking Ideas enpresako Pilar Kaltzadak komunikazioaren krisiari buruz hitz eginen du, eta Elhuyarreko zuzendaria den Jon Abrilekin krisi egoeretan aitzinera egiteko gakoak aztertuko dituzte.
Solasaldia
Solasaldiaren zatian bi kasu erreal aztertuko dituzte testigantza bitartez eta modu praktiko batean, euren esperientzia plazaratuko dute. Aitor Uriondo (Axular Lizeoko Zuzendaria) eta Joanmari Larrarte (Elkar taldeko Komunikazioa burua) izanen dira hizlariak. Krisi egoeretan eta komunikazioan izan duten esperientziaz mintzatuko dira.
Eztabaida gunea
Jardunaldiaren lehen bi zatietan jasotako galdera, iritzi eta zalantzek lekua izanen dute tarte honetan. Zalantza hauek aitzinetik aipaturiko lau protagonistek erantzunen dituzte.
Izen-ematea
Jardunaldian interesa dutenek izen-ematea www.nortasunasarean.eus webgunearen bitartez egin beharko dute. Parte-hartzea doakoa izanen da eta interesa duen orori irekia da.
TaPuntu Kooperatiba
TaPuntu kooperatiba marketin digitala, formazioa, diseinu grafikoa eta multimedia zerbitzuak eskaintzen dituen enpresa gaztea da. Kooperatibaren metodologiak bezeroen online nortasuna modu integralean lantzen du, horretarako beharrezkoak diren ekintzak gauzatuz. Kooperatibari buruzko informazio gehiago, eta orain arteko ibilbidea ezagutzeko: TaPuntu.eus atarian dago.