Nafarroako II. Mailako Aizkora Txapelketaren finala
Hiru saioko kirol hitzordua jokatuko dute igande honetan, ilbeltzaren 17an, Lekunberriko pilotalekuan. 12:00etan hasita, alde batetik, Nafarroako II. Mailako Aizkora Txapelketaren finala eginen dute. Bortz aizkolari ariko dira nor baino nor gehiago: Julen Olano (Leitza), Jesus Etxeberria (Beintza-Labaien), Asier Pellejero (Areso), Jon Telletxea (Beintza-Labaien) eta Txomin Amundarain (Arribe). Bi kanaerdiko, 60 ontzako bertze bi enbor eta oinbiko bat moztu beharko dituzte eta lehenbiziko bi sailkatuak mailaz igoko dira.
Nafarroako II. Mailako Aizkora, jaitsiera kanporaketa
Bertzetik, Jacinto Etxekonaneak (Beintza-Labaien) eta Patxi Mindegiak (Zubieta) bi kanaerdiko eta 60 ontzako bat moztu beharko dituzte. Gisa horretara jokatuko dute bigarren mailako jaitsiera kanporaketa. Joan den urteko bigarren mailako aizkora txapelketako kanporaketan, Mindegiak ezin izan zuen parte hartu lesio baten ondorioz. Kanporaketa hartan Jacinto Etxekonanea azken aitzineko sailkatu zen. Maila mantentzeko asmoarekin jaitsiera kanporaketa jokatzeko eskatu zuen Mindegiaren aurka. Hala, proba hau irabazten duenak bigarren mailan segituko du eta bertzea hirugarren mailara jaitsiko da.
Nafarroako Arpana Txapelketa Mistoa
Lekunberriko saioa borobiltzeko Nafarroako Arpana Txapelketa Mistoa jokatuko dute. Lerro hauek idazterakoan hamabi bikotek baieztatua zuten parte-hartzea.
- Lur Gil eta Saioa Izura
- Iker Goldarazena eta Oihane Ganuza
- Oier Kañamares eta Beatriz Tanco
- Unai Bertiz eta Esti Gastearena (Sunbilla)
- Irune Biurrun eta Daniel Saldias (Arraioz)
- Olatz Altuna eta Josu Elizalde
- Alaitz Olano eta Mattie Garaikoetxea
- Sela Goñi eta Jesus Goñi (Lekaroz)
- Andrea Goñi eta Oier Aizkorbe
- Ainhoa Iraizoz eta Josetxo Barberena
- Alberto Oteiza eta Marian Otxoa
- Josu Huarte eta Uxue Rodriguez
- Imanol Kañamares eta Irati Agirre
Etzanda paratutako 45 ontzako enborrean hamar ebaketa egin beharko dituzte.