Nafarroan alkoholaren kontsumoak estatuko bataz bertzekoaren gainetik egoten segitzen du, nahiz eta, azken bi urteetan beheranzko joera izan duen. 2019/2020 EDADES inkestaren arabera, inkestan parte hartutako %20,5 alkohol kopuru handia denbora tarte motzean edaten duela adierazi du; 2017/2018an eginiko inkestan %24,7 zen kontsumo mota hau egiten zuen partaideen kopurua. Estatuko bataz bertzeko zifra %15,4 kokatzen da. Nafarroan inkesta erantzun dutenen %8,9 azken 30 egunetan mozkortu dela baieztatu du. Estatu mailan, aldiz, kopurua %6,8 da.
Tabako kontsumoa
Alkoholaz gain, inkesta honetan tabakoaren kontsumoa ere aztertu dute eta Nafarroan nabarmenki goiti egin du tabakoaren kontsumoak. 2019/2020an eginiko inkestan parte hartzaileen %39,2 azken 30 egunetan tabakoa erre duela adierazi du; 2018/2019an kopurua %32,6 zen. Espainiako Estatuan bataz bertzeko joera alderantzizkoa izan da, beheranzkoa alegia: 2017an %38,8 ziren, oraingoan %36,8.
Kalamu kontsumoa
Kalamuaren kontsumoa, bai estatu mailan baita Nafarroan ere, egonkortu egin da. EDADES inkestan jaso denaren arabera, azken 30 egunetan kalamua kontsumitu dutenen kopurua %8,6 da Nafarroan eta %8 estatuan. Errezetarekin edo gabe Nafarroan hipnolasaigarriak hartzen dituztenak %7,8 dira, Espainiako Estatuan bataz bertzekoa baino gutiago.
Dirua jokatu
Nafarroan azken urtean dirua presentzialki jokatu dutenak %61,8 izan dira, estatuan baino gutiago (%63,6). Dirua jokatzearen barnean sartzen dira: loteria, kiniela eta antzerakoak. Dirua online jokatu dutenak %4,8 izan dira. 2017an dirua presentzialki jokatu zutenak gutiago ziren (%58,2) eta online jokatu zutenen kopurua egungoaren berdina. Espainiako Estatuan internetez jokatzen duten kopurua handiagoa da (%6,7) eta ia bikoiztu egin da 2017tik.