Azaroak 25

Malerrekako eta Bortzirietako Gizarte Zerbitzuek, ikastetxeekin elkarlanean, genero indarkeriaren aurkako egunarekin bat egin dute

Ttipi-Ttapa 2020ko aza. 25a, 16:30

Genero indarkeriaren aurkako egunaren bueltan, aurten, ezin izan dituzte aitzineko urteetan eskoletako ikasleekin batera egin izan diren elkarretaratzeak egin; egun bizi dugun egoera dela eta, segurtasun neurriak betetzea ezinezkoa bailitzateke.

Hala ere, Gizarte Zerbitzuek «bertze gauzak batzuk egiteko aprobetxatu dutela aldarrikatu dute». Horien artean, «nerabeei zuzendutako bideoa eta eskoletako ikasleentzako txapak eta boligrafoak» banatu dituzte.

Bideoa, Malerrekako eta Bortzirietako Oinarrizko Gizarte Zerbitzuek elkarlanean sortu dute, eta helburua, sare sozialen erabileraren inguruko hausnarketarako tarte bat egitea da. Izan ere, sortzaileek adierazi bezala «hauen erabilera egunerokotasuneko iturri bilakatu zaigu, non, askotan, ez garen gai pantailen aurreko mikromatxismoak, diskriminazioak eta gutxiesteak detektatu eta salatzeko». Hori dela eta, «sare sozialek nerabeengan duten kontrolean» paratu nahi izan dute begirada, «guztion esku baitago harreman sanoak garatu eta errespetuan oinarrituriko erlazioak sendotzea».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun