Euskal Herriko hirugarren mailako aizkolari txapelketako azken bi kanporaketak jokatu dituzte asteburu honetan Araban, larunbatean Agurainen eta igandean Aramaion. Nafarroako konfinamendu egoeraren ondorioz, aizkolari nafarrek ez dute parte hartzerik izan. Larunbatean, beraz, ez ziren Beintza-Labaiengo Jon Telletxea eta Etxarri Aranazko Goizeder Belza aritu eta igandean, Berako Oier Larretxea eta Arribeko Ibai Soroa eta Uharte-Arakilgo Iker Gorriti ere ez ziren plazaratu. Hori dela eta Federazioak aztertuko du egoera, posible bada pandemiaren ondorioz parte hartu ezin izan duen aizkolaririk txapelketatik kanpo ez uzteko.
Kanporaketei dagokienez, larunbatean Segoviako (Espainia) Alvaro Garciak eta Unai Otaegi gipuzkoarrak lortu zuten finalerako txartela eta igandean, Arabako Luis Polancok eta Gipuzkoako Julen Aranberrik. Beraiekin batera, joan den asteburutik txartela lortua zuten Arribeko Txomin Amundarain eta Leitzako Julen Olano ariko dira oraindik lekua eta data zehaztu gabeak dituen finalean.