Baiko enpresako arduradunekin bildu zen atzo Bilbon pilotarien ordezkaritza, joan den irailaren 16an pilotariek enpresari jarrera aldatzeko egindako eskaeraren ondotik lehenbizikoa. Ez ziren gustura atera, «ilusioz eta gogoz» joan baziren ere, enpresaren aldetik «borondaterik eza» ikusita, «burumakur, triste eta etsita» aterako zirelako. Horren ondotik, pilotariek gaur jakinarazi dute bihartik aitzinera greba eginen dutela. Enpresako hamabortz pilotarik eginen dute lanuztea, tartean, Oinatz Bengoetxea leitzarrak.
Zehazki ondoko hiru asteetan ortzirale, larunbat, igande eta astelehenetan eginen dituzte lanuzteak. Horren arabera, larunbatean Baikoko Asier Agirrek eta Joan Ander Albisuk jokatzekoa zuten Binakako Txapelketako partida erabakiorra ez da jokatuko eta finalera zuzenean sailkatuko dira Joseba Ezkurdia eta Julen Martija. Bertze aldaketarik ez bada, Aimar Olaizola goizuetarra eta Mikel Urrutikoetxea izanen dituzte kontrario urriaren 18an jokatuko den finalean.