Emakume Master Cup txapelketan izena emateko epea zabalik da dagoeneko. Eskuz banakako modalitatean jokatuko diren partidetan parte hartzeko bi kategoria izanen dira: pilota mistoa eta goxoa.
Lizentzia federatua duen jokalariek eta zaletuek eman dezakete izena, nazionalitatea edo jatorria edozein dela ere. Lizentzia indarrean dutenek ez dute deus ordaindu beharrik izanen eta zaletuek bortz euro ordaindu beharko dituzte (dirua txapelketa egunean ordainduko dute).
Sailkapen fasea urriaren 23an eta 24an jokatuko da, final-erdiak abenduaren 6an eta finala abenduaren 20an. Bertan parte hartu ahal izateko, izen-ematea urriaren 4ra arte dago zabalik www.emakumemastercup.eus helbidean.