Jorge Castellanos RACEko Bide Segurtasuneko buruaren ustez, gizakion senak animalia biziduna saihestera eramanen gaitu. Baina erreakzio horren ondorioz, «kontrako erreian sartu eta parez-pare datorren bertze ibilgailu batekin istripu bat izan dezakegu, edo bidetik atera eta zerbaiten kontra jo, edo gerta liteke, bolante-kolpearen ondorioz autoa iraultzea ere». RACEk egindako ikerketa batean, horrelako egoera bat bizitu duten gidariei galdetu ondotik zera ikusi dute: kasuen %23ak larrialdiko geldialdia egitea erabaki zuen, %50ak bolante-kolpe bat eman zuen eta %24a kontrako erreian sartu zen.
Castellanosen arabera, jokabiderik onena «bolante-kolperik ez ematea da, goazen erreian segitzea mugimendu zakarrik egin gabe, eta kolpea jo baino lehen ahalik eta gehien frenatzea».
Seguridad Vial aldizkariaren gomendioak:
- Ez eman bolante-kolperik eta ez egin mugimendu zakarrik.
- Frenatu indarrez 90 km/orduko baino gutiagora joanez gero, eta saiatu animalia ez kolpatzen aurrez aurre. Abiadura handiagoan joanez gero, frenatu pixkanaka.
- Kolpatu baino lehen, altxatu oina frenotik autoaren muturra altxatzeko eta animaliak kristalaren kontra ez jotzeko.
- Begirada autoa eraman nahi duzun tokira bideratu, eta ez begiratu animaliari.
- Kolpearen ondotik:
- gelditu autoa toki seguruan, galtzadatik kanpo.
- Jantzi txaleko islatzailea, eta piztu larrialdietako argiak.
- Seinaleztatu istripua larrialdietako triangeluekin. Ez hurbildu animaliarengana, zauritua egon daiteke eta arriskutsua izan.