Ikasturtea hastear den honetan, Nafarroako Gobernua protokoloak zehazten eta neurriak hartzen ari da. Berria egunkariak aditzera eman dutenez, Carlos Gimeno hezkuntza kontseilariak adierazi duenez, irakasle eta administrazio eta zerbitzuetako langileei testak eginen dizkiete. Gaineratu dutenez, «osasun egoera zaurgarriena» dutenetatik hasiko dira.
Birusaren kutsatze kopuruaren arabera, eremuka eginen dituzte probak eta egoera larriena den tokietan ikasleei ere probak egitea aztertzen ari direla adierazi dute. Oraindik plana zehazteke dagoen arren, xehetasunak laster emanen dituztela iragarri dute.
Elkarretaratzea asteazkenean
Ikasturtea hastear den honetan, hezkuntza komunitateak «ezjakintasuna» eta «informazio falta» salatu du. Horren aitzinean, plan bat diseinatzeko deia egin diote Hezkuntza Sailari.
Egoera salatzeko hainbat ekimen eginen dituzte: sinadura bilketa bat abiatu dute eta asteazkenean elkarretaratzea eginen dute Nafarroako Jauregiaren aurrean, 19:00etan. Deialdiarekin bat egin dute hainbat sindikatuk.