Ziurgabetasun-egoera honek, dirudienez, eragina izan dezake familiek ikasturtea hasteko egiten duten gastuan. Inkestako datuen arabera, gastua bertze urtetan baino ttikiagoa izanen da aurten, 235 euro inguru seme-alaba bakoitzeko. Nolanahi ere, erosketak neurrian egitera aholkatu du Irachek, benetako beharrei erantzuteko, eta gogorarazi du «erosketa horiek gure seme-alabak kontsumo arduratsuan hezteko bertze modu bat» direla.
Batzuk 100 euro baino gutiago eta bertze batzuk 600 euro baino gehiago
Arropa. Arropen prezioak aldatu egiten dira adinaren eta neurriaren arabera. Nolanahi ere, arraroa litzateke jaka, polo eta galtza batzuk 70 euro baino gutiago balio izatea, eta horri oinetakoak gehitu beharko litzaizkioke. Kirol-arropa ere erosi behar izanez gero, prezio horiek guztiak izugarri handituko dira; izan ere, lasai-lasai, bertze hirurogeita hamar euro ere joan daitezke, zapatilak kontuan hartu gabe.
Liburuak. Printzipioz, Lehen eta Bigarren Hezkuntzako ikasleek testuliburuen doakotasun-programetara jo dezakete.
Eskola-materiala. Gainerako eskola-materialari dagokionez, prezioetan alde nabarmenak daude produktu, marka eta aukeratutako establezimenduaren arabera. Izan ere, egiaztatu ahal izan da, konparaziora, 9 eurotik 65 eurora bitarteko motxilak daudela. Bertze artikulu batzuetan ere alde nabarmenak daude. Oro har, estutxe, boligrafo, arkatz eta pinturen gastua 28 eurotik gorakoa izan daiteke. Koadernoak, folioak eta karpetak ere gehitu behar dira. Guztira, kostu hori 90 eurokoa izan daiteke lasai aski; izan ere, osagarri dezente behar izaten baitira eta, berez ordainketa handia izan ez arren, guztizko baturan kostua igo egiten da. Gainera, zenbait tresna tekniko erosi behar badira (marrazketa-konpasak, kalkulagailu zientifikoa), zenbatekoa ere nabarmen igoko da.
AHOLKUAK
- Lehenik, seme-alabek behar duten guztiaren zerrenda prestatu.
- Etxean lehendik dauden materialak eta haien egoera kontuan hartu. Bi datu horiekin egin dezakegu aurten benetan erosi behar dugunaren zerrenda.
- Prezio merkeak aurkitzeko, begiratu establezimendu batean baino gehiagotan eta alderatu prezioak.
- Marken gainetik, baloratu produktuen prestazioak eta kalitatea.
- Adingabeen artean modan dauden produktuen markak eta pertsonaiak nabarmen garestitzen dute erosketa. Gure seme-alabak bertze balore batzuekin hezteko aukera bat dira ikasturte hasierako erosketak.
- Saltoki batzuetan deskontuak eta sustapenak eskaintzen dituzte. Lasaitasunez baloratu, kontsultatu arretaz baldintzak eta balio-datak, eta horiek denak produktuen kalitatearekin alderatu erosketa egin baino lehen.
- Aukeratutako arropa haurraren neurrikoa dela egiaztatu erosi baino lehen.
- Ikastaroa hasteko behar beharrezkoa dena erosi soilik. Gainerakoan, gerorako utzi hilabete batzuk igaro arte beharrezkoa ez den materialaren erosketa.
- Eskatu faktura banakatuak eta gorde erositako guztiaren fakturak, gero erreklamazioren bat egin behar bada ere.
- Eskatu informazioa administrazio publikoek eman ditzaketen laguntzei edo bekei buruz.