Elizondoko komisaldegiko foruzainek asteburuan Malerreka eta Bortziriak eskualdetan izan diren 'ez besten' harira, zenbait kontrol egin dituzte Beran, Etxalarren eta Sunbillan (N121A errepidean, Iruñea eta Behobia artean).
Hondarreko asteburuan egindako kontroletan 29 lagun salatu dituzte. Diario de Noticiasek aditzera eman duenez, geldiarazitako hamar ibilgailutan substantzia estupefazienteak atzeman zituzten (nagusiki kalamua eta haxixa) eta gidariek, legearen arabera, arau urratze larri horren ondorioz, 601 euroko isuna ordaindu beharko dute.
Bertze bortz pertsonen kasuan, drogen probetan positibo eman zuten eta arau hauste larri horren ondorioz, 1.000 euroko isuna paratu eta gidabaimeneko sei puntu kendu zizkieten.
Alkoholemia-proban positibo emateagatik bortz lagun salatu zituzten. Etxalarren, erraterako, gipuzkoar batek positibo emateaz gainera, justifikaziorik gabe, eskopeta bat zeraman. Sunbillan Granadako gidari bat salatu zuten, 0,63 mgr/l eman ondotik eta Beran 0,78 mgr/l eman zuen Iturengo herritar bat.
Gainerako arau hausteak segurtasun-uhala ez paratzeagatik (4), aurikularrak paratuta gidatzeagatik (1), asegururik ez izateagatik (1) eta epai ondoko berreziketa kurtsoa ez egiteagatik (1) izan ziren.